ULMA Agricolaren ekoizpen planta berriarekin prozesu industrial eraginkorrago eta jasangarriagoetara jauzi bat eman da nekazaritza laboreetarako, landare eta lore mintegietarako, akuikulturarako, abeltzaintzarako eta biltegiratzerako berotegien fabrikazioan. Instalazio berriei esker, laboreen produktibitatea eta kalitatea errazten duten berotegi sistema aurreratuagoak diseinatuko dira eta, aldi berean, uraren eta ongarrien erabilera arrazionalizatu.
Plan Estrategiko berriaren esparruan, ULMA Agricolak abangoardiako ekoizpen planta bat inauguratu du, eta jasangarritasunean, eraginkortasunean eta sektorearen etorkizuneko eskaeretara egokitzeko gaitasunean erreferente izango dela espero da. Guztira 10,5 milioi euro inbertitu dira azpiegituran eta teknologian, eta, inbertsio hori eginda, 9.000 m² baino gehiagoko espazio hori konpainiak berrikuntzarekin eta hazkunde jasangarriarekin duen konpromisoaren adierazgarria da.
Plantak eraginkortasun energetikoko eta funtzionaltasun aurreratuko hainbat neurri ezarrita ditu, etengabe aldatzen ari den merkatuaren erronkei erantzuteko.
“Berotegiko laboreak direla, gaur egun, nekazaritza produkzioaren apustu seguruena, baldintza meteorologiko, izurrite eta gaixotasun gero eta aldakor eta oldarkorren aurrean; produktuaren kalitatea eta hornidurak ezarritako datan egiteko konpromisoak ziurtatzeaz gain, uraren kontsumoan %40era arteko murrizketa eta uraren erabileran aurrezpen nabarmena dakarte”.
Alberto Galdos ULMA Agricolako zuzendari gerentea
Plantillaren %25eko handitzea
Planta berria Oñatin dago, eta plantilla %25 handitzea ahalbidetuko du, batez ere ingeniaritza industrialeko eta klima kontroleko teknologiako arloetan. Enpresak, beraz, talentu espezializatua erakartzearen aldeko apustua egiten du, garapen profesionalerako plataforma moderno eta iraunkorra eskainiz. Egungo plantilla 35 lagunek osatzen dute Oñatin eta 10 lagunek Mexikoko filialean.
Bisita instituzionala ULMA Agricolara
Gaur, Amaia Barredo eta Xabier Arruti Eusko Jaurlaritzako eta Gipuzkoako Foru Aldundiko nekazaritza sailetako arduradun nagusiak egon dira planta berrian, bisitan, Izaro Elorza Oñatiko alkatearekin batera.
Instalazio berrietatik egindako ibilbidean hau nabarmendu dute: Eusko Jaurlaritzako Elikadura, Landa Garapen, Nekazaritza eta Arrantzako sailburu Amaia Barredoren ustez, “Euskadin, Europar Batasuneko gainerako herrialdeetan bezala, lehen sektoreak teknologia eta ezagutza eguneratze etengabea eta bizia behar du, eta, ziur asko, sartzen ari diren belaunaldi gazteek ekarpen handiagoa egin dezakete”.
Lurralde Oreka Berdeko foru diputatuak pozik hartu du ULMA taldeak egindako apustua, hau da, inbertitzea eta ekoizpen planta bat garatzea, “elikagai jasangarrien eta kalitatezkoen ekoizpenean jauzi kualitatiboa emateko”. Arrutik adierazi duenez, Gipuzkoan horrelako planta bat izatea positiboa da, ez soilik ikuspegi ekonomikotik eta lurraldean kalitatezko enplegu aukerak sortzeari dagokionez, baizik eta “baserritarrei soluzio berritzaileak ematea bilatzen duen tresna bat delako, eguneroko lana errazteko, efizientzian eta ekoizpenean irabaziz, herritarren beharrak asetzeko eta tokiko elikadura jasangarria sustatzeko, guztion ongizatearen mesedetan”.
Merkatuak eta erronkak
ULMA Agricolak 50 herrialde baino gehiagotan ditu proiektuak, baina bere merkatu nagusiak Amerikako kontinentean kokatzen dira, batez ere Estatu Batuetan eta Mexikon, non bere salmenten %60 fakturatzen duen. Hain zuzen ere, Alberto Galdosen esanetan, bere erronketako bat da “oraindik finkatu gabe gauden merkatuetan gure presentzia handitzea eta datozen lau urteetan fakturazioa %35 handitzea”.
Iaz salmentak 11,3 milioi eurora iritsi ziren eta ekitaldi honetarako 13,5 milioikoak izango direla zenbatetsi da.